Munkeno → trafiko → publika trafiko → MVV

Publika trafiko en Munkeno: MVV (Munkena Trafik-Ligo)

Je la 28a de majo 1972 la publikaj amas-trafikiloj de Munkeno kuniĝis por formi ligon kun unueca tarifo kaj kunordigitaj horaroj. Tiu ĉi ligo nomiĝis Münchner Verkehrs- und Tarif-Verbund . Ĝi iĝis modelo por multaj similaj institucioj.

Jen kruda priskribo de la trafik- kaj tarif-sistemo, sen ajna garantio (stato: 2006-01-01):

La trafikiloj

La tarifa areo de MVV ampleksas ne nur la urbon, sed ankaŭ la ĉirkaŭan regionon ĝis distanco de kelkdek kilometroj. Per MVV-bileto eblas en tiu areo uzi jenajn trafikilojn:

S-Bahn, tio estas antaŭurbaj trajnoj ligantaj la urbon kun la regiono. Temas pri ruĝaj motortrajnoj elektraj (linioj S1 – S8, S20, S27) aŭ dizelaj (linio A). La biletoj validas ankaŭ en aliaj trajnoj, kiuj verturas inter stacioj de la tarif-areo, escepte de specialtarifaj aŭ alpagaj rapidaj trajnoj (IC, EC, ICE ktp.).
La linioj S1 – S8 traveturas la urbocentron en tunelo, malfermita en 1971. Ekster tiu tunelo la liniaro disbranĉiĝas okcidente al sep, oriente al kvin direktoj. La linioj veturas ĝis la 23-a horo po ĉiujn 20 minutojn, sed ofte ĉiu dua aŭ tria trajno servas nur parton de la linio kaj ne atingas ties finajn staciojn.
Linio A servas proksimume ĉiuhore la trafikon inter Altomünster kaj Dachau, kie ĝi konektiĝas al la linio S2.
La lastaj trajnoj foriras de la urbocentro proksimume je la 1-a horo matene; je sabataj kaj dimanĉaj matenoj estas plia trajno post la 2-a horo. Bonvolu atenti, ke tiuj indikoj estas nur proksimumaj, kaj ĉiam orientiĝi laŭ la oficialaj horaroj.
U-Bahn, metroa sistemo funkciigata de la urba asocio MVG . Ekzistas ok linioj U1 – U8, sed esence temas pri tri lini-paroj, kiuj trafikas urbocentre en tri tuneloj, kiuj ekster la centro disbranĉiĝas kaj parte ankaŭ rekuniĝas aŭ interkruciĝas. La metroo centre konektiĝas kun la S-Bahn en la stacioj Hauptbahnhof, Karlsplatz kaj Marienplatz kaj ankaŭ aliloke kun unupaj S-linioj. Metroaj linioj veturas normale ĉiujn dek minutojn, en kernaj tempoj ĉiujn kvin minutojn, malfrue vespere kaj kaj semajnfine matene ĉiujn 20 minutojn. Kie du linioj kuniĝas, ili veturas alterne. En la du kruciĝaj stacioj Scheidplatz kaj Innsbrucker Ring la linioj renkontiĝas samtempe dum la 10-minuta takto, sed alternas dum la 5-minuta.
Tramo, same funkciigata de MVG. Ĝi veturas surtere, sed multloke apartigite de la aŭta trafiko.
Busoj, en la urbo funkciigataj de aŭ komisie de MVG, ekster la urbo ankaŭ de aliaj firmaoj. La densecoj de la busaj horaroj estas tre malsamaj; kelkaj linioj veturas nur ĉiuhore aŭ nur je certaj tempoj.

Tarifo kaj biletoj

La areo de la Munkena Trafik-Ligo (MVV) estas dividita al kvar ringoj, blanka, verda, flava kaj ruĝa. La blanka (interne) egalas proksimume al la urbo Munkeno. Ĉiu ringo estas tarifa "zono". Ringoj, kiujn oni traveturas dufoje, necesas ankaŭ pagi dufoje; sed maksimume oni pagas por kvar ringoj dum unu veturado.

Por vizitantoj de la urbo interesas plejparte tri specoj de biletoj (stato: 2006-01-01). Ĉiujn necesas tempo-stampi komence de la veturado. La stampiloj estas en bulaj kestoj kun nigra litero "E" sur flava fono; ĉe tramoj kaj busoj ili estas en la veturilo, ĉe rapidfervojoj (S-Bahn, U-Bahn) enire al la kajoj.

Unupaj biletoj: Ili ekzistas por diversaj ŝtupoj: vetureto (Kurzstrecke), 1, 2, 3 kaj 4 ringoj/zonoj. Unuopa bileto validas por unu veturado ene de certa tempo, kiu dependas de la ŝtupo; tabelo estas sur la bileto aŭ en vitrino stacidoma. La veturado devas ĉiam iri direkte al la komenca celo, sed en la donita limtempo eblas interrompi la veturadon, ekz. por butikumi survoje. "Vetureto" finiĝas plej malfrue je la kvara stacio, kaj maksimume du el tiuj kvar sekcioj povas esti en "rapidfervojo" (= S-Bahn aŭ U-Bahn); la aliaj du povas esti nur busaj aŭ tramaj. Por infanoj ekzistas speciala tarifo, tre favora.
Stribiletoj: Ili konsistas el vico da strioj; por ĉiu zono necesas uzi du striojn. Unu strio servas por vetureto. Oni konsumas la striojn stampante la plej altan. Ekzemplo: Por veturi 2 zonojn necesas 4 strioj; se jam 3 strioj de la bileto estas konsumitaj, necesas stampi la 7-an strion.
Stribiletoj ebligas porti kun si "provizon" da biletoj kaj estas rabatitaj.
Tagaj biletoj: Ili permesas ajne ofte veturi dum unu tago (de la stampado ĝis la 3-a hore de la sekva mateno). Ili ekzistas por plenkreskulo, infano kaj grupo de kvin plenkreskuloj kaj validas laŭ elekto por la urbo (Innenraum, blanka zono), la eksterurba teritorio (Außenraum, verda+flava+ruĝa) aŭ ambaŭ; krome ekzistas speciala regiono "XXL", kiu enhavas la blankan kaj verdan zonojn.
Por la blanka zono ekzistas ankaŭ tritagaj biletoj. Veturantoj de/al la flughaveno atentu, ke la taga bileto por la tuta areo kostas ne multe pli ol unu veturado inter flughaveno kaj urbocentro; ĝi do preferindas, se oni samtage faras almenaŭ unu plian veturadon.